Ċirku vizzjuż

Tnissilt ġo ġnien
magħluq,
imdallam,
bla fwieħa.
Fil-friegħi ta' min nislek
għarwiena,
maħnuqa,
għajjiena.
Fejn mank lanqas żiffa iċċaqqlaq ftit l-arja
tqila,
xiħa,
qadima.


Li kieku taħtaf ċansek.
Tintelaq meta jonfoħ bla mistenni r-riħ.
Li kieku anke int tara l-ġmiel ta' ġonna għammiela.
Li kieku anke int tħaddar.
Li kieku anke int tfewwaħ.
Li kieku ....

22.7.2007

Titnissel fid-dlam,
itrabbi għeruqha,
tissaqqa,
b'imħabba
fid-dlam.

Tixref f'waqtitha,
tiħdar,
tisbieħ.
Titqawwa
kontra l-irjieħ.

... l-imħabba.

21.10.2007

Riflessi

Inħares fil-baħar,
kristall,
ħarir.

U nara xbiheti
ezatt kif inhi.

Ir-riħ jaħsel jonfoħ
iżid,
il-ħalel jgħolli rasu.

Xbiheti tiċċajpar,
itnin.

23.11.2007

Bibien magħluqa

Mix-xaqq tal-bieb
misjur biż-żmien
nosserva d-dinja għaddejja.
Imgħaġġla,
kajmana,
imnikkta,
ferħana,
ħosbiena,
għal rieħa.

Nosserva,
nitħasseb,
niġġudika.

10.7.2007

Iż-Żmien

qatra,
qatra,
qatra,
qatra...

b'intervalli perfetti
bla waqfien,
jimlew ġarra tal-porċellana.

15.10.2007

Ir-Realta'

Meta għajnejja jkunu magħluqa
kollox jidher sabiħ,
OK,
perfett.

Meta niftaħ għajnejja
xejn ma jibqa' perfett.
Imma xorta jkun OK,
sabiħ.

22.9.2008

Couvre de Sac

Waqt ġirja sfrenata
b'għajnejk imgħottija,
dħalt f'sqaq ...
Waqaft, għax sfurzat.
Bla triq imnejn taħrab.
Ħarist x'hemm madwarek,
u mxejt it-triq lura.

17.3.2007

Fil-Ħsieb

Waħdi,
flimkien miegħi nnifsi.
Bis-skiet ikellimni.
B'xoftejja mitbuqa
ngħajjat lid-dinja.
Bil-passi żgħar tiegħi
jaqsmu l-abbissi.

B' għajnejja miftuħa.

5.1.2009